Skip to main content

؟Gamification ليه العالم كله رايح للـ




تعالوا الأول نقول يعني إيه Gamification..


الـ Gamification جاي - زي ما هو واضح - من كلمة Game.. وعشان نقصر المسافات ومنهريش كتير فمعناه ببساطة: استخدام وتطبيق تقنيات وعناصر الألعاب وآليات عملها في سياقات ومجالات أخرى غير مرتبطة بالألعاب مثل البيزنس والتسويق والإعلام والتعليم، بغرض مشاركة المستخدمين في حل المشاكل وتحقيق أهداف محددة.

هنلاقي كذا تعريب للكلمة زي: التلعيب أو اللوعبة أو اللعبنة، وإن كنت بصراحة مش حابب ولا اسم منهم.. هو اسمه جاميفيكيشن وخلاص 😊 وأدينا قولنا تعريفه من شوية.

طيب ليه ابتدى الموضوع ده ينتشر في آخر 7 أو 8 سنين تحديدًا رغم إن الفكرة موجودة من زمان؟

خلينا نتفق إن مبدئيًا مفيش حد بيلعب لعبة بالعافية.. يعني كل واحد لما بيلعب لعبة بيلعبها بمزاجه ومحدش بيجبره عليها.. ليه؟ لإنها ببساطة لعبة، بتقرر تلعبها وقت ما تحب، وبتسيبها وقت ما تحب، وإنت اللي بتختار تلعبها أصلاً من البداية.

اللعبة بتوفرلك بيئة آمنة مفيهاش تهديد عليك من أي نوع.. مفيش مشكلة إنك تغلط وتغلط وتغلط.. بتتعلم من الخطأ في إطار مَرِح ولذيذ ومليان تحدي.. آخرك هيحصلك إيه يعني؟ هتعيد المرحلة من الأول؟ لا لا فيه أسوأ من كده.. إنك تعيد اللعبة من الأول خالص مثلاً؟! 😝 ولا أي حاجة.. ما إنت كده كده مبسوط وبتقضي وقت لطيف وممتع.. ولا فيه مدير مستحلفلك لما تغلط.. ولا أخ كبير حاطك في دماغه.. ولا بابا وماما بتتشاقى قدامهم.. ولا أي حاجة.. ومن وجهة نظري دي أكتر حاجة منجحة الفكرة.. إنك بتتعلم في إطار ترفيهي لطيف جدًا ومفيش أي تهديد عليك من أي نوع.. كمان ماتنساش إن الفكرة اللي بتقتنع بيها أو بتشتريها يعني وقت استمتاعك بتفضل فاكرها ومعلمة في ذهنك.. عشان كده مثلاً لما بتتفرج علي فيلم فيه رسالة أو قيمة عايز يقدمهالك بتفضل فاكر الحتة دي كويس لإنها جتلك في الأساس في إطار شيق فإنت مبدئيًا مستعد لاستقبالها وأرضك خصبة جدًا لتنميتها.. طبعًا ده فضلاً عن باقي الحاجات اللي بتدعم ده.. زي مثلاً الخبرة الشخصية التي بتعشها في اللعبة أو الفيلم والمؤثرات السمعية والبصرية إلى آخره.

كل لعبة ليها عالمها الخاص واللي بيدخلك في حالة من الانغماس الكامل والاستغراق بيسموها الـ Magic Circle وهو الحيز اللي بيتم فيه إلغاء قواعد الحياة والعالم الحقيقي وبنستبدلها بقواعد اللعبة والمشاكل اللي بنواجهها فيها.. م الآخر بتتفصل تمامًا عن العالم المحيط بيك.

4 حاجات بتخلينا مندمجين في اللعبة:

1- اللعب في الأساس يسبب حالة من المتعة بتيجي من كومبو المغامرة والفضول والمفاجأت والألوان والشخصيات.....
2- الإحساس بالنجاح وده طبعًا بيحصل على طول في الألعاب.. انتقال من مرحلة لمرحلة ومن وَحْش لوَحْش وهكذا وإنت ماشي بقى.
3- المعنى البطولي.. لإنك غالبًا في اللعبة بتكون بتقوم بدور البطل ودي حاجة كلنا بنحبها حتى لو اختلفت نسب حبنا ليها.
4- أخيرًا الترابط الاجتماعي.. وده بيحصل طبعًا في الألعاب اللي بتتعلب من مجموعة أشخاص سواء كانوا متنافسين كأفراد أو متقسمين في مجموعات متنافسة.. بيبقى فيها Socilalization.

بصوا ع التجربة دي.. لقوا الناس في السويد بيستخدوا السلم الكهربائي رغم إن مش كلهم كبار في السن أو مرضى.. فقرروا يطبقوا تقنية من تقنيات الألعاب.. بصوا إيه اللي حصل 👇



الغريب بقى جدًا في التجربة دي إنهم لقوا 66% من الناس سلوكهم اتغير من استخدام السلم الكهربائي للسلالم العادية لمجرد إدخال المرح على حاجة مملة. إنتو متخيلين؟! تِلتِين الناس سلوكهم اتغير لما ابتدوا يلاقوا حاجة لذيذة فيها ولعب وتنطيط 😲... واااااااو

مثال تاني بسيط مرتبط بشغلي كـ HR.. كل الـ HRians عارفين إن عملية التوظيف عملية مملة إلى حد كبير ونمطية جدًا.. تعالوا بصوا بقى ع اللقطة اللي جاية دي 👇



إيه ده؟ الـ Recruitment تحول فجأة للسلم والتعبان؟ ياااه.. دي حاجة لطيفة أوي والله.. شايفين المود اتغير تمامًا إزاي؟!


تخيلوا لو عرفنا نستخدم الفكرة دي في حياتنا.. مع أولادنا في المدارس وهما بيذاكروا.. مع الموظفين في الشركات.. مع أولادنا في البيت.. في التسويق لمنتجاتنا.. وغيره وغيره..

تخيلوا لو بننجز أعمالنا وبنحقق أهدافنا وإحنا مبسوطين وبنلعب.. أكيد هتبقى حاجة تحفة!!!

طبعًا أنا هنا مجرد بعرض الفكرة بس لكن الموضوع أكبر وأعمق من كده بكتير.. هتلاقوا تحت بعض اللينكات اللي ممكن ترجعولها لو حبيتوا تدخلوا في الموضوع أكتر.

1- دي دورة  تعريفية مجانية - باللغة العربية - على منصة إدراك بعنوان "تقنيات الألعاب التحفيزية Gamification": 

2- ده موقع لأحد أشهر عباقرة العالم في هذا المجال وهو الدكتور Sivasailam Thiagarajan: 

3- وده موقع لمنهجية الـ octalysis وهي من المنهجيات اللي بتتميز بشموليتها لصابحها Yu-kai Chou:

4- بعض الكتب المفيدة برده لمحبي القراءة:
- The Art of Game Design, Jesse Schell


- Thiagi's 100 Favorite Games

ده كده بشكل سريع جدًا نظرة عابرة على مفهوم الـ Gamification واستخداماته ببساطة..

منتظر بقى تفاعلكم وآراءكم وتعليقاتكم ومقترحاتكم..


#تفانين_ابو_المحاسين #ImpactPassion
#Gamification #Fun # Education
Labels:

Comments

Post a Comment

Popular posts from this blog

Ctrl+Time جربتوا الشورت كت دي قبل كده؟

في سنة 2009 كنت ابتديت أتعلم حل روبكس كيوب.. أيوه هو اللي في الصورة اللي فوق ده.. هذا المكعب العجيب الذي كان في بيوت أغلب أبناء جيلي وكنا كلنا بنتخلَّق عليه في الآخر وبنخبطه في الحيطة لما بنعجز تمامًا عن حله. بعد ما اتعلمت أحله بعد حوالي 8 أسابيع من بداية تاريخ أول يوم ابتديت أتعلم فيه، لقيت الراجل المحترم اللي بيعلمني أنا واللي معايا بيقول ياللا بقى إنتو دلوقتي اتعلمتوا تحلوه بالطريقة الأساسية وإنتو بتحلوه بقى شوفوا ممكن إيه الخطوات اللي ممكن تختصروها عشان تحلوه أسرع. نورت معايا هنا فكرة اختصار الخطوات .. الـ Shortcut .. بس كانت الفكرة مجرد طيف في دماغي.. مش مديها كل تركيزي بس حطيتها في حتة في مخي على جنب كده وخلاص. في الشغل مين فينا مابيحتاجش يستخدم الوورد والإكسيل والباوربوينت مثلاً؟ طبعًا كلنا بنستخدمهم.. أكيد مش بنفس الكثافة ولا بنفس درجة الإتقان لكن بنستخدمهم أكيد.. لكن أنا بحكم شغلي في الموارد البشرية كنت بحتاج الوورد في كتابة السياسات واللوائح والخطابات والعقود وغيرها.. والإكسيل طبعًا لما ابتديت أكبر شوية في الكاريير بتاعي بقى في غاية الأهمية.. تحليل الأحداث وال...
2 comments
Read more

في ‏رثاء ‏أبي ‏وأمي.. ‏رحمهما ‏الله ‏تعالى

هذه كلمات كنت قد كتبتها في مناسباتٕ متفرقة على مدار الخمسة أعوام الأخيرة، منذ أن رحلت أمي في سبتمبر في 2015 ثم أبي بعدها بعاميْن في نفس الشهر من عام 2017. جمعتها من أماكن مختلفة.. كلمات شعر بها قلبي وترك الإفصاحَ عنها لقلمي... (1) أنتما الحياةُ وما أدركنا أن فقدَها فقدُكما.. وليتَ التمني يعيدُ نُجُمَاً كنا يومًا نَرْمِقُها.. فكيفَ تطيبُ الحياةُ بغيرِ حبيبيْن مثلِكما.. بل إن شئتَ قلْ وهل يحلو في الكونِ شيءٌ بدونكِما.. (2) سيمرُ المُرُ حتمًا ويعودُ الفرحُ باقٍ.. لا في دنيا تزولُ بل أقصدُ ذاك التلاقي.. يومَ نلقى الأحبةَ ونجتمعُ بعدَ اشتياقِ.. حين تشدو القلوبُ طربًا.. وداعًا دموعَ المآقي.. تلاقي الخلودِ أهلا.ً. تلاقٍ بلا افتراقِ.. (3) أبي وأمي.. جُرْحٌ غَائرٌ في قلبِ الزمانِ لا تُداويهِ الأيامُ والسنونْ.. أبي وأمي.. حنينٌ هادرٌ في قلبِ إنسانٍ يكادُ يوصِله لحدِ الجُنونْ.. تِيِهٌ هيَ الحياةُ بغيرِ وجودِكم.. تَهَدَّمَ الصرحُ فلا قلاعٌ ولا حصونْ..  وصِرْتُ أُقَاسِي العيشَ بِدونِكم.. فالأمنُ زائلٌ والفرْحُ غائبٌ والحضورُ فتونْ..  فَاجْبُرْ يا ربِ قلوبًا كُسِرَتْ لِفَقْدِ أح...
Post a Comment
Read more

أدوار مختلفة.. قبعات متعددة

#من_النضج أن تعي أن لك أدوارًا مختلفة في الحياة، أو أن لديك قبعات متعددة "Multiple Hats" ترتديها بحسب أدوارك التي تؤديها في حياتك.. فمثلاً لديك قبعة الابن الذي لا بد أن يَبَرَّ والديه، ولديك قبعة الطالب الذي ينبغي أن يجتهد في دراسته، ولديك قبعة الزوج الذي يهتم بأمر زوجه وبيته ويسعى في قضاء الحوائج، ولديك قبعة الموظف الذي عليه أن يُحسِن في عمله، وقد تكون في نفس الوقت مديرًا لموظفين تحت إدارتك فعليك إدارتهم بالحق وألا تظلم أحدًا وأن تُنجز من خلالهم الأعمال الموكلة لك كمدير لهم، ولديك قبعة الأب الذي يربي أبناءه ويهتم لشؤونهم... إلى غير ذلك من أدوار يستطيع كل واحد منا أن يحصرها لنفسه. ليس الأمر هكذا وفقط، ففي أحيان كثيرة تجد أنك في كل دور من هذه الأدوار وأنت ترتدي القبعة الخاصة به أن لك أدوار فرعية متباينة أو قبعات تقع تحت نفس فئة اللون لكن بدرجات مختلفة، فالقبعة الزرقاء قد تجد منها الأزرق الداكن والسماوي والكحلي... إلى آخره. ماذا أقصد بهذا الكلام؟ أقصد أنك وأنت تؤدي دور الأب مثلاً تارة تكون مُربيًا وتارة أخرى تكون صديقًا مُدَاعِبًا وثالثة تكون قدوةً ونموذجًا يُتَّ...
1 comment
Read more