Ctrl+Time جربتوا الشورت كت دي قبل كده؟

في سنة 2009 كنت ابتديت أتعلم حل روبكس كيوب.. أيوه هو اللي في الصورة اللي فوق ده.. هذا المكعب العجيب الذي كان في بيوت أغلب أبناء جيلي وكنا كلنا بنتخلَّق عليه في الآخر وبنخبطه في الحيطة لما بنعجز تمامًا عن حله.

بعد ما اتعلمت أحله بعد حوالي 8 أسابيع من بداية تاريخ أول يوم ابتديت أتعلم فيه، لقيت الراجل المحترم اللي بيعلمني أنا واللي معايا بيقول ياللا بقى إنتو دلوقتي اتعلمتوا تحلوه بالطريقة الأساسية وإنتو بتحلوه بقى شوفوا ممكن إيه الخطوات اللي ممكن تختصروها عشان تحلوه أسرع.

نورت معايا هنا فكرة اختصار الخطوات.. الـ Shortcut.. بس كانت الفكرة مجرد طيف في دماغي.. مش مديها كل تركيزي بس حطيتها في حتة في مخي على جنب كده وخلاص.

في الشغل مين فينا مابيحتاجش يستخدم الوورد والإكسيل والباوربوينت مثلاً؟ طبعًا كلنا بنستخدمهم.. أكيد مش بنفس الكثافة ولا بنفس درجة الإتقان لكن بنستخدمهم أكيد.. لكن أنا بحكم شغلي في الموارد البشرية كنت بحتاج الوورد في كتابة السياسات واللوائح والخطابات والعقود وغيرها.. والإكسيل طبعًا لما ابتديت أكبر شوية في الكاريير بتاعي بقى في غاية الأهمية.. تحليل الأحداث والمواقف والأعمال في شكل أرقام وتحليلها وقياسها وبناء القرارات على أساسها كان ولا يزال جزء مهم جدًا من شغلي..

ابتديت أحس إني بعمل شوية اختصارات Shortcuts على الكيبورد.. كنت فاكر إن كل الناس عارفاها لغاية ما اكتشفت إن هناك قلة قليلة من الناس بتعرف الاختصارات دي.. وابتديت آخد بالي إن الاختصارات دي بتخليني أنجز حاجتي أسرع من اللي حواليا وطبعًا بالنسبة للي حواليا بقيت جهبذ من جهابذة ميكروسوفت أوفيس عشان بعرفلي اختصارين تلاتة أي عيل صغير النهاردة هايبقى عارف 10 أضعافهم.

ومع شوية تأمل زيادة حبتين ابتديت أسأل نفسي هو ليه اللي فكر يخترع الطيارة فكر يخترعها أساسًا، قعدت أفكر لقيت الإجابة بتدور حوالين نفس الفكرة.. فكرة الشورت كت برده، بدل ما نركب ونفضل نلف حوالين الجبال ونعمل طرق في الصحاري ونعدي محيطات كبيرة، طب ما تقصر على نفسك الطريق وتختصر كل ده، الوقت والمجهود والتكلفة إن تخترع طيارة أقل بكتير من إنك تحول كوكب الأرض لشبكة طرق وكباري وأنفاق.

فاكرين رأس الرجاء الصالح اللي خدناه زمان في الجغرافيا وإزاي إن قناة السويس لما اتحفرت واشتغلت قصرت الأوقات والمسافات في حركة التجارة العالمية؟ برده هي نفس الفكرة.

وهنا بقى ابتديت أسأل نفسي بشكل أكثر عمقًا ليه الشورت كت أصلا؟

1. بتخليك أسرع من غيرك، حتى لو مفيش منافسة بتختصر وقتك. 
2. بتعمل مجهود أقل، مش لازم كل مرة نروح نعيد اختراع العجلة من الأول. 
3. مع التكرار بيتحول أي شيء لعملية ميكانيكية محفوظة وبالتالي بتبقى أسرع من اللي حتى اكتشف الشورت كت دي بس لسه لم يتقنها أو لسه ممارسهاش لدرجة إنه حولها لعادة.
4. طبعًا كل ده بيحسسك بالإنجاز والسعادة لإنك بتخلص حاجات كتير في وقت قليل. 
5. وده بالتأكيد هيديك مساحات أكبر في الحياة إنك تنجز حاجات أكتر من حيث الكم أو حاجات أكثر تنوعًا أو تنجز الاتنين مع بعض. 

عايز هنا بس أوصَّل فكرة إن الشورت كتس دي كل واحد يقدر يخلقها لنفسه على حسب مرجعياته هو وطبيعة الحاجات اللي محتاج فيها قصة الشورت كتس دي، أهم حاجة إنها تكون بشكل أخلاقي ولا تتصادم مع الدين.. بمعنى أوضح يعني مثلاً ماينفعش نقول إن الرشوة شورت كت لإنها بتنجزلك مصالحك لإنها حرام وغير أخلاقية. 

هشارك معاكو شوية أفكار وأنواع شورت كتس خاصة بيَّا من باب توضيح الفكرة وإنك ممكن تطبقها على أي حاجة في حياتك:

1. من أهم الاختصارات اللي ربنا وفقني لفهمها العلاقات بين الأشياء الغيبية وحياتنا اليومية، زي مثلاً حديث "داووا مرضاكم بالصدقة" وزي الاستغفار وارتباطه بالبركة في الرزق وتفريج الكروب، وزي استخارة ربنا في كل الأمور اللي إحنا مقبلين عليها سواء كانت كبيرة أو صغيرة، وإن صنائع المعروف تقي مصارع السوء، وبر الوالدين وعلاقته برضا ربنا والبركة في العمر. 

2- من الاختصارات المهمة كمان وهي بحكم إني بشتغل إتش آر فطبيعة شغلي بتخليني أتكلم أكتر عن الناس أتكلم بمشاعرهم وأنقل عنهم أحاسيسهم وعواطفهم، طبعًا ده شيء جميل ولطيف لكني فوجئت رغم تفاعلي النفسي العميق مع مشاكلهم إلا إني لقيت إني لما بتكلم مع الإدارة العليا - وده في أكتر من شركة - لقيت نفسي بتكلم بلغة محدش فاهمها، محدش بيتأثر التأثر ده ولا فيه قرارات بتتاخد عشان فلان زعلان أو محبط أو غيره من المشاعر الإنسانية.. استغربت جدًا وبعد كتير من التفكير والتحليل والتأمل والقراية في الموضوع وسؤال أهل الخبرة فهمت إن المستويات الإدارية العليا بتفهم لغة الإحصائيات والأرقام ودي حاجة أنا ماكنتش بجيدها لكن هي دي اللغة الأهم والأكثر وضوحًا عند المستويات العليا من الإدارة.. فاتعلمت أركز على الأرقام وإيجاد العلاقات الرقمية بين الأشياء.. ماتقولش فلان مضايق من كذا.. قول إن فيه 3 من أصل 5 في القسم الفلاني سابوا الشغل السنة اللي فاتت وكان السبب هو كذا ومش بس كده لازم تحط مقترح أو أكتر لحل المشكلة دي من وجهة نظرك عشان تسهل عليهم اتخاذ القرار. 

3- أنا من الناس اللي مش شغوفة بالقراية ولا بيبقى عندي وقت كافي أقرا كتب.. فابتديت أشوف إزاي ممكن أستفيد من الكتب اللي أساميها بتشدني أو بلاقي حد يرشحهالي..  فلقيت دلوقتي إنه بقى متاح مثلا الكتب الصوتية تقدر تسمعها في عربيتك في سريرك وإنت نازل تشتري حاجة للبيت.. طب مالكش خلق تسمع نص كتاب كامل.. بقى فيه ملخصات الكتب زي مثلا قناة "علي وكتاب" و"الزتونة" و"جيل يقرأ" وغيرها كتير.. طب برده بتزهق من المود ده وبتحب تتفرج على حاجات فيها مؤثرات بصرية ورسومات وحركات هتلاقي قناة اسمها "أخضر" بتلخص الكتب برده بشكل جميل جدًا وممتع ومش ممل.

4- مثال أخير.. كلنا بنحتاج في شغلنا أو دراستنا أو حياتنا بشكل عام نكتب أو نبعت حاجات بالإنجليزي وزمان في الوورد كان منتهى أملنا إننا ندور على المدقق الإملائي أو الـ Spelling Checker، طبغًا كان دوره يطلعلنا الكلمات المكتبة غلط ويطلعلنا اقتراحات للتصحيح وإحنا نختار منهم.. لكن طبعًا ده مش كافي لو بنكتب إيميل أو خطاب أو مقال بالإنجليزي لإن عنصر صحة التراكيب اللغوية مهم جدًا هي مش شوية كلمات جنب بعض وخلاص.. لقيت من حوالي 4 سنين عن طريق الصدفة المحضة وأنا بدور على حل للمشكلة دي برنامج اسمه Grammarly بيحل الأزمة دي بنسبة كبيرة لإنه بيعمل دور المدقق الإملائي وكمان دور المصحح النحوي - إن جاز التعبير - طبعًا مفيش حاجة هتديك دقة بنسبة 100% لكن هيفرق جدًا وبشكل ملحوظ في تظبيط حتة الـ Grammar دي.. دلوقتي بقى موجود كمان على الموبايلات وبقى ليه Extension على جوجل كروم وفيه برنامج بتقدر تعملَّه داونلود من الويب سايت بتاعهم شخصيًا بينزل add ons على الوورد والأوت لوك عشان يشتغل أوتوماتك على طول من غير ما تفضل رايح جاي كوبي بيست.

الموقع أهو: https://www.grammarly.com/

بعد شوية ممارسة للشورت كتس هتكتشف إنها ابتدت تعملك زي مانيوال كده لحياتك.. كل واحد يقدر يعمل المانيوال ده تفصيل على مزاجه وعلى مقاسه.. تقدر تعمل لنفسك شورت كتس في علاقاتك الشخصية.. في شغلك.. في الطرق اللي بتمشي فيها بعربيتك كتير.. في برامجك اللي بتستخدمها في شغلك كتير.. مع والدك ووالدتك.. مع زوجتك وأولادك.. مع أهلك وقرايبك.. مع أصحابك.. مع كل حاجة في حياتك سواء كانت مادية أو غير مادية..

اللي حاولت أعمله في المقالة دي هو الوعي بالفكرة لإن حاجات كتير جدًا مننا مبنعرفش نغتنمها لإننا مش على وعي بيها بس ومجرد الوعي ببعض الحاجات واللي بيدخلها في دايرة تركيزنا ممكن يغير حاجات كتير جدًا في حياتنا.. مش بس كده.. ده ممكن يغير حياتنا كلها بشكل مكناش نتوقعه..

لو عجبتكم المقالة يا ريت تقولي رأيكم في التعليقات وتنشروها مع أصحابكم.. ويا ريت كمان تشاركونا الشورت كتس اللي عندكم من باب مشاركة الخبرات وتعظيم الأثر.

دمتم بخير 😊

#تفانين_ابو_المحاسين #ImpactPassion

#PersonalDevelopment